超趣爭黃頌顯盃 09/07/2023 今期沙田黃昏賽亦係主席賽馬日，除咗尾場三班1400米，其餘10場賽事都係跑以前馬會主席命名嘅盃賽，咁啱兩位前馬會主席黃頌顯同埋陳南祿今日都有派馬上陣，陳南祿有份嘅公平團體就有「耀寶駒」、「冠寶駒」分途出擊，後駒咁啱就係跑陳南祿錦標。另外，黃頌顯嘅「超趣」出戰第3場五班1600米黃頌顯盃，如果由自己愛駒捧走以自己個名命名嘅盃，必屬一時佳話，當中又以「超趣」餐士似乎高啲。 黃頌顯 由高伯新訓練嘅8歲英國PP「超趣」，上季中因為霍利時突然唔玩散倉，最終加盟高伯新馬房，結果轉倉第2戰就喺三班田草1800米跑第3名，上季尾落到四班亦於谷草1800米入Q，可惜今季可能年紀又大一歲，表現唔算太好，10次出賽全部輸晒，慶幸由60分減到依家得39分，首度落到五班出賽，更有1檔好位，應該有啲優勢，再睇番上仗四班谷草1800米，只落後頭馬「管之友」唔夠兩馬位，走勢亦有起色。話晒高伯新臨別在即，如果今次可以為前主席黃頌顯捧走黃頌顯盃，對佢同馬主嚟講，都係一個難忘嘅回憶。 超趣降至五班出賽有力反擊。